وآدي أغنية "الحزن محاوطكي" برضه من نفس الحفلة، وبرضه من تصويري

من حفلات ساقية الصاوي

افتتاحية (العدد؟؟)

أعزائي القراء
مدونة بزيادة (أو مجلة بزيادة، زي ما تحبوا) فكرة قديمة جديدة، أكيد شفتوا كتير زيها وغيرها وأحسن منها ع الإنترنت، بس بالنسبة لنا إحنا هي حلم بيتحقق، من أيام الطفولة وانا وكل أفراد الأسرة بنحلم بالصحافة، و ده طبعاً كان قبل أيام الإنترنت بكتيييير، طول عمرنا نجتمع ، ونشتري كام ورقة فولسكاب، ونسطرهم، و نرسم ونلون ، ونكتب أفكارنا ونعيش في الأحلام، وطبعاً كنا إحنا برضه الجمهور الأوحد لمجلاتنا الكتيرة، اللي ما أصدرناش من أي واحدة منها أكتر من عددين اتنين، القصد، بعد ما العالم أصبح قرية صغيرة، وبعد ثورة المعلومات والاتصالات (والكلام الكبير ده) فكرنا كتير نستغل أجهزة الكمبيوتر الموجودة ف بيوتنا ف حاجة غير الألعاب ، وقلنا ما نبخلش علي البشرية (جمعاء) بمواهبنا المدفونة، ومين عارف يمكن كلامنا يكون له معني، يمكن
ما اطولش عليكم، ها نكتب ورزقنا علي الله