رحت و جيت مشيت لفيت تعبت شقيت
زهقت رجعت ادور علي مكاني
ما انا اكيد ليا مكان في بلادي
بس مش لاقيه راح فين مكاني!
سألت الناس قالوالي نط عليه حرامي
خد اللي ورايا واللي قدامي
صرخت بكيت وقلت ياريت مارجعت تاني
بصيت للناس لقيتهم ملهيين
شمال ويمين ماشيين
والدنيا زيطه ولمه وكله مشغول ب همه
ياناس الحقوني انا اتسرقت انا اتنهبت و اتظلمت
ردوا الشمتانين وقالوا القانون لا يحمي المغفلين
قلت ايه خلاص مفيش ناس طيبين!
الطيبين قالوا قسمه ونصيب
ما احنا كمان منهوبين ارضي زى ما احنا راضيين
قلت وليه بالظلم ارضي
قالوا يابخت من بات مظلوم ولا باتش ظالم
يا اخواننا انا مش ظالم دا انا اتسرقت و انا نايم
ايه مفيش امان دي الناس زمان كانت في الشارع بتنام
قالوا قول للزمان ارجع يا زمان
قلت الزمان مش هو المشكله
المشكله ف الناس المطنشه
ليه يا ناس ساكتين
مسروقين و منهوبين و بالظلم راضيين
مفتحين بس مش شايفين
صرخت بعلو صوتي يا امه فوقي
بصولى الناس مدهوشين
اللي قال مجنون و اللي قال مسكين
جريت وراهم اصحي يا ابويا فوق يا اخويا
تعبت و دخت من طولي وقعت
فقت لقيتني نايم في متر× متر
اخيرا فهمت وعلي شقايا في الدنيا ندمت
!!! (شيماء)
